ამაზონის ტყეების ნაწილი უფრო მეტ ნახშირორჟანგს გამოყოფს, ვიდრე შთანთქავს

ამაზონის ტროპიკული ტყეები მნიშვნელოვან როლს ასრულებენ კლიმატის ცვლილების წინააღმდეგ ბრძოლაში. თუმცა, მეცნიერთა ახალმა გამოკვლევამ აჩვენა, რომ ამაზონის ტყეების ნაწილი უფრო მეტ ნახშირორჟანგს გამოყოფს, ვიდრე შთანთქავს. ამის შესახებ გამოცემა CBS news წერს.

2010 წლიდან 2018 წლამდე ჯუნგლების ოთხ უბანზე დაკვირვებამ აჩვენა, რომ  ტყეების გაჩეხვამ და კლიმატის ცვლილებამ გაახანგრძლივა მშრალი სეზონები და ტყეები ხანძრისკენ მიდრეკილია.

მეცნიერთა მიერ ჩატარებულმა კვლევამ აჩვენა, რომ ამაზონის ჩრდილო-დასავლეთით მდებარე რეგიონი, სადაც თითქმის მთელი წლის განმავლობაში კლიმატი ნესტიანია, მცენარეულობა კი პრაქტიკულად უცვლელი რჩება მთელი წლის განმავლობაში, ნახშირბადის ბალანსს ინარჩუნებს. ანუ, იგი შთანთქავს დაახლოებით იმავე რაოდენობის ნახშირბადს, რამდენსაც გამოყოფს. მაგრამ რაც უფრო სამხრეთით მოძრაობდნენ მკვლევარები, მით უფრო ირღვეოდა ეს წონასწორობა.

სამხრეთ-აღმოსავლეთ და ჩრდილო-აღმოსავლეთი რეგიონები,  წვიმების პერიოდში ინარჩუნებენ წონასწორობას. მაგრამ მშრალ პერიოდში ისინი უფრო მეტ ნახშირორჟანგს გამოყოფენ, ვიდრე ადრე.

მაგალითად, სამხრეთ-აღმოსავლეთი რეგიონი, რომელიც ამაზონის ტყის მთლიანი ტერიტორიის დაახლოებით 20%-ს შეადგენს, უფრო მეტ ნახშირორჟანგს გამოყოფს, ვიდრე შთანთქავს

სტატიის ავტორი: report.ge